राजु शर्मा
सप्तरी । सप्तरीको खडक नगरपालिका–१, सिस्वा बेल्हीस्थित साना किसान कृषि सहकारी संस्थाका अध्यक्ष र व्यवस्थापकले सेयर सदस्यको नाममा किर्ते कागज गरी ऋण निकालेर करिव ८९ लाख रुपैयाँ हिनामिना गरेको फेला परेको छ । संस्थाका अध्यक्ष रामनारायण साह र ब्यवस्थापक श्रवणकुमार साहको मिलेमतोमा उक्त रकम हिनामिना भएको हो ।

२१ जना सेयर सदस्यको नाममा ८५ लाख ४ हजार ५ सय ५२ रुपैयाँ संस्थावाट ऋण निकालीएको छ । २०६३ सालमै भएको उक्त घटना कतिपय सञ्चालक समितिकै सदस्यका कारण आन्तरिक सहमति गरी गुपचुप राखिएको थियो । तर, तोकिएको समयमा समेत रकम फिर्ता नभएपछि सेयर सदस्यले नै अध्यक्ष र व्यवस्थापकको गलत क्रियाकलाप सार्वजनिक गरेका छन् ।

‘त्यतिवेला संचालक समितिका अधिकांश सदस्यहरुले आन्तरिक रुपमै समस्या समाधान गर्नुपर्छ भनेपछि हामी पनि तयार दवाव पर्यौ’ सेयर सदस्य देवप्रसाद साहले भने–‘तर, तोकिएको समयमा पनि उनीहरुले पैसा जम्मा नगरेपछि संस्था जोगाउँन घटना सार्वजनिक गर्नु पर्यो ।’
    सेयर सदस्यको नाममा ऋण लिएको तथा संस्थामा जम्मा भएको रकम आफूले हिनामिना गरेको ब्यवस्थापक साहले स्वीकार गरेका छन् ।

उनले आफुले गलत गरेको स्विकार्दै २०७५ साउन १६ गते लिखित कागज गरेर २०७५ पुस मसान्तभित्र ब्याजसहित रकम फिर्ता गर्ने प्रतिबद्धता जनाएका थिए।

उनले असुलीबाट जम्मा भएको ३ लाख ९४ हजार ६ सय १० रुपैयाँसमे समेत हिनामिना गरेको स्विकारेका छन् । अध्यक्ष रामनारायणले भने ब्यवस्थापकको कृयाकलापमा आफनो सहमति नभएको जिकिर गरे।

ब्यवस्थापकलाई कारवाहीको सिफारिस, भएन सुनुवाई

रकम हिनामिनाको विषयमा सेयर सदस्यहरुले खडक नगरपालिका कार्यालय, जिल्ला प्रशासन कार्यालय सप्तरी र साना किसान विकास लघुवित्त संस्था इलाका कार्यालय जनकपुरलाई समेत उजुरी दर्ता गराएका छन् ।

सोहि उजुरीका आधारमा साना किसान विकास लघुवित्त संस्था इलाका कार्यालय जनकपुरले साउनको दोश्रो साता नै ब्यवस्थापकलाई २४ घण्टाभित्र निलम्वन गर्न पत्राचार गरेको थियो । यसैगरी, नगरपालिकाको कार्यपालिकाको वैठकले पनि श्रवणलाई १ महिना निलम्वन गर्ने र घटनाको छानविन गर्ने निर्णय गरेको छ । तर, ब्यवस्थापक साह अहिले पनि कार्यालयमा कार्यरत छन् । 

सञ्चालक समितिका अध्यक्ष साहले भने गाउँकै मान्छे भएकाले कारवाही नगरीएको वताए । ‘गाउँकै मान्छे हुन्, रकम असुल भइहाल्छ’ उनले भने–‘कारवाही गरिरहनुपर्छ भन्ने नलागेरै प्रकृया अगाडि नवढाईएको हो ।’

साना किसान विकास लघुवित्त संस्था इलाका कार्यालय जनकपुरका प्रवन्धक विशाल तुलाधरले पनि सहकारीमा ठुलै रकम हिनामिना भएको स्विकारे । ब्यवस्थापकले हालसम्म पनि हिसाव दुरुस्त नवनाएकाले नगरपालिका कार्यालयले अनुसनधान गरिरहेको उनले जानकारी दिए ।