नेपाली पासपोर्ट बद्नाम बन्दै गएको श्रृंखला फलस्वरुप विभिन्न देशका अध्यागमनले कडाई गरी नेपाली नागरिकको प्रवेशमा रोक लगाउने क्रम तीब्र बनेको छ । कलाकारको भेषमा युरोप, अमेरिका, जापान, हङकङमा प्रवेश गरी भूमिगत हुने क्रम बढेपछि ती देशका सुरक्षा निकाय निर्मम बनेका हुन् । 

सांस्कृतिक कार्यक्रमका लागि जापान पुगेका चर्चित हास्यकलाकार उमेश राई (फुलन्देकी आमा) जापानको नारिता विमानस्थलबाटै फर्काइएपछि यो विषयले चर्चा पाएको हो । उनीसंगै लोकगायिका सविना गुरुङ पनि थिइन् । अघिल्लो वर्ष नेपाली कांग्रेसका युवा नेता प्रदीप पौडेललाई समेत जापानको नारिता विमानस्थलबाटै नेपाल फर्काइएको थियो ।  

पछिल्लो समय  आफ्नो प्रस्तुति दिन विदेश गएका नेपाली कलाकारहरुलाई एक पछि अर्को किसिमका अवरोध पुर्याउन थालिएको बताइन्छ । यसैक्रममा केही महिनाअघि मलेसिया पुगेका गायिका श्रेया राई र सुनिता थेगिमलगायतका कलाकारलाई प्रहरीले पक्रेर कस्टडीमा राखेको थियो । 

तमु धिं जापानको रजत महोत्सवको अवसर पारेर आयोजना गरिएको रोधी साँझ कार्यक्रमको लागि यी कलाकारलाई निम्त्याइएको थियो । उनीहरुलाई नेपालस्थित जापानी दूतावासले प्रवेशाज्ञा ९ भिसा दिएको थियो । तर जापानको विमानस्थलबाट बाहिरिने क्रममा भएको चेकजाँचमा प्राविधिक त्रुटी भएको भन्दै उनीहरुलाई फिर्ता पठाइएको तमु धिं जापानले एक विज्ञप्ति प्रकाशित गरी जानकारी दिएको छ ।

यी दुई कलाकार नभए पनि कार्यक्रम भने तोकिएकै मितिमा हुने आयोजकले जनाएको छ । 
 

नेपाली पासपोर्ट फुलेन्देकी आमा