धनुषाः अवैध उत्खननको विरोध गर्दै आएका मिथिला नगरपालिका–५ श्रीपुरका २४ वर्षीय ओमप्रकाश महतो (दिलीप) को हत्या आरोपमा प्रहरीले क्रसर मालिक विपीनकुमार महतोलाई पक्राउ गरेको छ । इलाका प्रहरी कार्यालय ढल्केवरका अनुसार क्रसर उद्योग मालिक विपिनलाई जनकपुरधाम उपमहानगरपालिका–१ भानू चोकबाट शनिवार विहान १० बजे पक्राउ गरिएको हो ।

दिलिपको शवलाई कुल्चेको आरोपमा टिपर चालक मुनिन्द्र महतोलाई शुक्रबार नै प्रहरीले पक्राउ गरिसकेको थियो ।

शुक्रवार विहान करिब ४ बजेको समयमा औरही नदीमा भइरहेको अवैध उत्खननलाई रोक्न जाँदा दिलिपलाई टिपरले किचेर हत्या गरिएको थियो ।

हत्यापछि परिवारजनले चुरियामाई बालुवा प्रशोधन केन्द्रका समालिक विपिन महतोसहित स्थानीय प्रशासन, वडाध्यक्ष लगायतको संलग्नतामा हत्या गरिएको आरोप लगाएका छन् । क्रसर मालिक विपिनले नै दिलीपको हत्या गरेको आरोप उनका परिवारजनले लगाएपछि उनी फरार थिए ।

धनुषा अवैध उत्खनन विपीनकुमार महतो