काठमाडौंः अष्ट्रेलियामा जारी बिग बास लिग (बीबीएल) अन्तर्गत आफ्नो नवौं म्याचका लागि ब्रिसबेन हिटले टोली घोषणा गरेको छ । ब्रिसबेनले आज क्रिस लिनकाे नेतृत्वमा १३ सदस्यीय टोली घोषणा गरेको हो ।

ब्रिसबेनले आफ्नो नवौं म्याचमा राशिद खान सम्मिलित एडिलेट स्टाइकर्ससँग खेल्न लागेको हो । ब्रिसबेन र एडिलेटबीचको खेल मंगलबार दिउँसो १ः५५ बजेदेखि सुरु हुनेछ ।

ब्रिसबेनले नवौं म्याचमा स्टार क्रिकेटर एबी डिभिलियर्स र मुजीउर रहमानलाई टिममा भित्र्याएको छ । उनीहरु ब्याट्सम्यान टम ब्यान्टन र बलर जाहीर खानको स्थानमा टिममा भित्रिएका हुन् । ब्रिसबेनले ब्यान्टन र जाहीरलाई नौं म्याचका लागि टिममा अनुबन्ध गरेको थियो ।

ब्रिसबेनले नेपाली लेग स्पिनर सन्दीप लामिछानेआवद्ध मेलबर्न स्टार्ससँगको दोस्रो खेल २५ जनवरीमा खेल्ने छ । मेलबर्नसँग पहिलो खेलमा ब्रिसबेन २२ रनले पराजित भएको थियो ।

आठ म्याच खेल्दा लिन नेतृत्वको ब्रिसबेनले ४ खेलमा जित हासिल गर्दा ४ खेलमै हारको सामना गरेको छ । अंक तालिकामा हिट ८ अंकका साथ पाँचौ स्थानमा छ । यता एडिलेटले पनि ८ खेलमा ४ म्याचमा जित हासिल गरेको छ । उसले ३ खेलमा हारको सामना गर्दा एक म्याचमा भने वर्षा कारण अंक बाँडेको थियो । ट्रभिस हेड कप्तान रहेको एडिलेट ९ अंकका साथ तालिकाको तेस्रो स्थानमा छ ।

अंक तालिकाको शीर्ष स्थानमा भने ग्लेन म्याक्सवेल नेतृत्वको मेलबर्न स्टार्स छ । उसले ९ म्याच खेल्दा ८ मा जित हासिल गर्दै १६ अंक जोडेको छ । मेलबर्नले आफ्नो दशौं म्याच बुधबार खेल्दै छ । उसले दशौं म्याचमा पर्थ स्कोरचर्सको सामना गर्नेछ ।

बिग बास लिग बीबीएल मेलबर्न स्टार्स ब्रिसबेन हिट