पुलिसद्वारा सुदूरपश्चिमलाई २३० रनको लक्ष्य, दीपेन्द्रको लगातार अर्धशतक
काठमाडौंः सुनसरीको इनरुवामा जारी मनमोहन मेमोरियल एकदिवसीय राष्ट्रिय क्रिकेट प्रतियोगिताको दोस्रो सेमिफाइनलमा नेपाल पुलिस क्लबले सुदूरपश्चिम प्रदेशलाई २ सय ३० रनको लक्ष्य दिएको छ ।
टस जितेर पहिला ब्याटिङ गरेको पुलिस क्लबले ४९ ओभरमा सबै विकेट गुमाएर २ सय २९ रन बनायो । उसका लागि दीपेन्द्रसिंह ऐरीले अर्धशतक बनाए । उनले ७६ बलमा १ छक्का र ६ चौकाको मद्दतमा ६८ रन बनाए ।
जारी प्रतियोगितामा दीपेन्द्रको यो लगातार दोस्रो अर्धशतक हो । यस्तै बलर ललितसिंह भण्डारीले ४० बलमा ४ छक्का र २ चौका हिर्काउँदै ४० रन बनाए । पुलिसका लागि अनिलकुमार शाहले ३१, योगन्द्र सिंह कार्कीले २९, कुशल भुर्तेलले १७ रनको योगदान दिए । अन्य खेलाडीले भने दोहोरो अंकमा समेत रन बनाउन सकेनन् ।
बलिङमा सुदूरपश्चिमका आकाश चन्द, शेर मल्ल, विनोद लामाले ३–३ र कप्तान सन्तोष भट्टे एक विकेट लिए । आजको विजेता टिम फाइनलमा नेपाल आर्मीको सामना गर्ने छ ।
आर्मी बुधबार भएको खेलमा प्रदेश ३ विरुद्ध ६४ रनले विजयी हुँदै फाइनल प्रवेश गरेको थियो । सेमिफाइनल खेलमा पहिले ब्याटिङ गरेको आर्मी ४६.३ ओभरमा २ सय १६ रनमा अलआउट भएको थियो ।
आर्मीका लागि अनिल मण्डलले सबैभन्दा बढी ४३ रन जोडेका थिए । सो खेलमा कुशल मल्लले २६ बलमा ३७ रनको योगदान गरेका थिए ।
बलिङमा प्रदेश ३ का गौतम केसीले ४ विकेट लिएका थिए । ४७ ओभरमा २१७ रनको लक्ष्य पछ्याएको प्रदेश ३ ले ३८।१ ओभरमा अलआउट हुने क्रममा १५२ रन मात्र जोडेको थियो । प्रदेश ३ का लागि सोनु तामाङले ७४ रन जोडेका थिए ।
अन्य ब्याट्सम्यान सस्तैमा आउट हुँदा उनको इनिङ काम लागेन । बलिङमा आर्मीका सुसन भारीले ३ विकेट लिए भने साहब अलामले २ विकेट हात पारेका थिए ।
एकदिवसीय राष्ट्रिय क्रिकेट दीपेन्द्रसिंह ऐरी एमएम कप
