काठमाडौंः भारत विरुद्धको एकदिवसिय क्रिकेट सिरिजको दोस्रो खेलमा पनि अष्ट्रेलियाले टस जितेर बलिङ रोजेको । भारत र अष्ट्रेलियाबीचको खेल १ः५५ बजेदेखि राजकोटमा सुरु हुँदैछ ।

भारतले दोस्रो खेलमा २ खेलाडी परिवर्तन गरेको छ । उसले ऋषभ पन्तको स्थानमा मनीष पाण्डे र शार्दुलको ठाउँमा नवदीप शैनीलाई टिममा मौका दिएको छ । अष्ट्रेलियाले भने पहिलो खेलकै प्लेइङ सेटलाई मैदान उतारेको छ ।

पहिलो खेलमा १० विकेटको लज्जास्पद हार बेहोरेको भारतले दोस्रो खेलमा बदला लिने योजना बनाएको छ । घरेलु मैदानमा १५ वर्षपछि १० विकेटको फराकिलो हारपछि निराश बनेको भारतलाई सिरिज जिवितै राख्न आजको खेल जित्नैपर्ने दबाब छ । यदि दोस्रो म्याच पनि गुमाएमा भारतले सिरिज नै एक खेल अगावै अष्ट्रेलियालाई सुम्पिन बाध्य हुनेछ ।

भारतको प्लेइङ ११ः रोहित शर्मा, शिखर धवन, विराट कोहली, केएल राहुल, श्रेयस अय्यर, मनीष पाण्डे, रवीन्द्र जडेजा, नवदीप सैनी, मोहम्मद शामी, कुलदीप यादव र जसप्रीत बुमराह।

अष्ट्रेलियाको प्लेइङ ११ः आरोन फिन्च, डेविड वार्नर, मार्नस लाबुशेन, स्टिभ स्मिथ, एस्टन टर्नर, एलेक्स क्यारी, एश्टन एगर, प्याट कमिन्स, मिचेल स्टार्क, झाय रिचर्डसन र एडम जाम्पा ।

राजकोटको मैदान भारतको खराब रेकर्ड

आज अष्ट्रेलियासँग खेल्ने ‘सौराष्ट्र क्रिकेट संघ स्टेडियम’मा भारतीय टिमले अधिकांश खेलमा पराजय भोगेको छ । भारतीय टिमलाई जहिल्यै पनि यो रंगशालाले साथ दिइरहेको छैन । भारतले ११ जनवरी २०१३ मा यो स्टेडियममा इंग्ल्याण्डविरुद्ध पहिलो वानडे म्याच खेलेको थियो । जसमा भारत ९ रनले पराजित हुन पुगेको थियो ।

त्यसपछि १८ अक्टुबर २०१५ मा दक्षिण अफ्रिका विरुद्ध पनि भारत यही मैदानमा भिडेको थियो । जसमा घरेलु टिम इन्डिया १८ रनले हार बेहोर्न बाध्य भएको थियो । अष्ट्रेलियाको टिमले यही मैदानमा भारतसँग १० अक्टुबर २०१३ मा खेलेको टी–२० म्याचमा पराजित गरेको थियो । भारतीय टिम राजकोटमा आज करिब ४ वर्षपछि म्याच खेल्ने मैदान प्रवेश गर्नेछ । यो मैदानमा भारत अष्ट्रेलियासँग पहिलोपटक वानडे म्याच खेल्दै छ ।

ऋषभ पन्त एकदिवसिय क्रिकेट सिरिज अष्ट्रेलियाविरुद्ध भारत