बिग बास लिगः १२औँ म्याचका लागि पनि टिममा अटाए सन्दीप
काठमाडौंः अष्ट्रेलियामा जारी बिग बास लिग (बीबीएल) अन्तर्गत आफ्नो १२ औँ म्याचका लागि मेलबर्न स्टार्सले टोली घोषणा गरेको छ । मेलबर्नले आज ग्लेन म्याक्सवेलको कप्तानीमा १३ सदस्यीय टोली घोषणा गरेको हो ।
१२ औं खेलका लागि पनि नेपाली लेग स्पिनर सन्दीप लामिछाने टीममा मौका पाएका छन् । सोमबार हुने सिड्नी सिक्सर्स विरुद्धको खेलमा नाथन कल्टर–नाइललाई मेलबर्नले विश्राम दिएको छ । उनको स्थानमा अर्का फास्ट बलर ज्याकसन कोलम्यानलाई मौका दिइएको छ ।
अघिल्लो खेलमा कोलम्यानलाई सामान्य चोटका कारण आराम दिइएको थियो । उनले आफ्नो पहिलो खेलमै शानदार बलिङ गरेको थिए । र,कोलम्यान ‘म्यान अफ द म्याच’ घोषित भएका थिए । ११ म्याच खेल्दा मेलबर्नले १० म्याचमा जित हासिल गरेको छ । उसले एडिलेट स्टाइकर्स विरुद्धको खेलमा मात्र झिनो रन अन्तरले हार बेहोरेको थियो ।
मेलबर्नले १० खेल जित्दै २० अंक जोडेको छ । र, सन्दीपआवद्ध स्टार्स अंक तालिकाको शीर्ष स्थानमा छ । यता सिड्नी सिक्सर्सले ११ म्याचमा ६ खेल जितेको छ । र, उसले १३ अंक बनाएको छ । मोइसिस हेनेरिक्स कप्तान रहेको सिक्सर्स अंक तालिकाको दोस्रो स्थानमा छ । सिक्सर्समा टम करन, जेम्स विन्स, नाथन लायनलगायत स्टार क्रिकेटर छन् ।
सिक्सर्सविरुद्ध खेल्ने मेलबर्नको टीमः ग्लेन म्याक्सवेल (कप्तान), हिल्टन कार्टराइट, ज्याक्सन कोलम्यान, बेन डंक, सेब गोच, क्लिन्ट हिन्चलिफ, सन्दीप लामिछाने, निक लार्किन, निक म्याडिन्सन, जोनाथन मेर्लो, लान्स मोरिस, मार्कस स्टोइनिस र डानियल वर्रल ।
मेलबर्नविरुद्ध खेल्ने सिक्सर्सको टीमः ओस्टिन अभेन्डानोऽ ज्याक्सन बर्ड, टम कुरान, बेन द्वारशुइस, मिकी एडवर्ड्स, मोइज हेनरिक्स (कप्तान), ड्यान ह्युजेस, जेम्स विन्स, नाथन लायन, स्टीभ ओकिफ, जोस फिलिप, लोयड पोप र जोर्डन रेशम ।
