काठमाडौंः अष्ट्रेलियामा जारी बिग बास लिग (बीबीएल) अन्तर्गत आफ्नो पाँचौ खेलमा नेपाली क्रिकेटर सन्दीप लामिछाने सम्मिलित मेलबर्न स्टार्सले आज आफ्नो पाँचौ म्याच खेल्दै छ । मेलबर्नले पाँचौ म्याच सिड्नी थन्डरविरुद्ध खेल्न लागेको हो । सिड्नी–मेलबर्नबीचको खेल बिहान १०ः२५ बजेदेखि सुरु हुनेछ । 

सुरुवातका ४ खेलमा मौका पाएका सन्दीपले पाँचौ म्याच भने गुमाउने भएका छन् ।  चोटका कारण सन्दीपले सिड्नी विरुद्धको म्याच गुमाउने भएका हुन् । बुधबार सार्वजनिक गरेको १३ सदस्यीय टोलीमा पनि सन्दीप अटाएका छैनन् । उनको स्थानमा टाेलीमा पाकिस्तानी तिव्र गतिका बलर हरिश रौफलाई मौका दिइएको छ ।  

जारी सिजिनमा सन्दीपआवद्ध मेलबर्नले ४ म्याच खेल्दा एकमा हार र ३ खेलमा जित हासिल गरेको छ । सन्दीपले ४ म्याच खेल्दा ३ विकेट लिएका छन् । 

उनले पहिलो खेलमा ४, दोस्रो, तेस्रोमा ३ र चौथो खेलमा २ ओभर बलिङ गर्ने मौका पाएका थिए । पहिलो खेलमा महँगा सावित भएका सन्दीप त्यसपछिका खेलमा भने लय समात्न सफल भएका थिए ।

सिड्नीविरुद्ध मेलबर्नले सार्वजनिक गरेको टोलीः ग्लेन म्याक्सवेल (कप्तान), हिल्टन कार्टराइट, नाथन कल्टर–नाइल, बेन डन्क, पीट ह्यान्सकम्ब, क्लिन्ट हिन्चलिफ, निक लार्किन, निक म्याडिन्सन, हरिश रौफ, डेल स्टेन, मार्कस स्टोइनिस, डानियल वर्रल र एडम जम्पा । 

बिग बास लिग बीबीएल सन्दीप लामिछाने मेलबर्न स्टार्सविरुद्ध सिड्नी थन्डर