काठमाडौंः अष्ट्रेलियामा जारी बिग बास लिग (बीबीएल) अन्तर्गत नेपाली लेग स्पिनर सन्दीप लामिछानेआवद्ध मेलबर्न स्टार्सले ब्रिसबेन हिटविरुद्ध खेल्न लागेको छ । आजको म्यचा खेल्दा सन्दीप नयाँ उपलब्धि हासिल गर्ने लक्ष्यका साथ मैदान प्रवेश गर्ने छन् ।

यदि आजको खेलमा उनले २ विकेट लिनसके सन्दीपले नेपाली क्रिकेटमा इतिहास रच्ने छन् । उनले आज २ विकेट लिनसके टी–२० मा विकेटको शतक बनाउने छन् । हालसम्म टी–२० क्रिकेटका सन्दीपको नाममा ९८ विकेट रहेको छ । अघिल्लो खेलमा विकेटविहीन रहेका उनी आज इतिहास रच्ने सुनौलो अवसरमा छन् । 

ब्रिसबेनविरुद्ध मेलबर्न आफ्नो १४ औँ म्याच खेल्न लागेको हो । मेलबर्न र ब्रिसबेनबीचको खेल दिउँसो १ः५५ बजेदेखि सुरु हुनेछ । ‘प्लेअफ’मा स्थान बनाउन ब्रिसबेनलाई आजको खेल जित्नैपर्ने दबाब छ । मेलबर्न यसअघि नै ‘प्लेअफ’मा पुगिसकेको छ । उसले १३ म्याच खेल्दा २० अंक जोडेको छ । जारी बीबीएलमा मेलबर्नले १३ खेलमा ३ म्याचमा मात्र हारको सामना गर्नु परेको छ । मेलबर्नले २ पटक एढिलेड स्टाइकर्स र एकपटक सिड्नी सिक्सर्सविरुद्ध मात्र हार बेहोरेको छ ।

आजको खेलमा पनि प्लेइङ ११ मा अटाउने सन्दीपको सम्भावना बलियो छ । उनी मेलबर्नले शुक्रबार घोषणा गरेको १३ सदस्यीय टोलीमा पनि अटाइसकेका छन् । उनीसहित आज २ विदेशी बलरले मौका पाउने सम्भावना छ । मेलबर्नको चौथौं म्याचदेखि पाकिस्तानका फास्ट बलर दिलदार हुसेन जोडिएका छन् । उनी पाकिस्तानी अर्का तिव्रगतिका बलर हरिस रौफको स्थानमा टीममा जोडिएका हुन् । जारी प्रतियोगितामा सन्दीपले १२ म्याच खेल्दा १४ विकेट लिएका छन् । 

टी–२० क्रिकेट बिग बास लिग सन्दीप लामिछाने ब्रिसबेन हिटविरुद्ध मेलबर्न स्टार्स