बिग बास लिगः सन्दीपआवद्ध मेलबर्न स्टार्सको चौथो जित
काठमाडौंः अष्ट्रेलियामा जारी बिग बास लिग (बीबीएल) अन्तर्गत सिड्नी थन्डरविरुद्ध सन्दीप लामिछाने सम्मिलित मेलबर्न स्टार्स ३ विकेटले विजयी भएको छ । सिड्नीले दिएको १ सय ४३ रनको लक्ष्य पछ्याएको मेलबर्नले १९.४ ओभरमा ७ विकेट गुमाएर पूरा गर्यो ।
उसका लागि मार्कस स्टोइनिस र निक लार्किनले अर्धशतक बनाए । निकले ४५ बलमा १ छक्का र ८ चौकाको मद्दतमा ६५ रन बनाए । टी–२० क्रिकेटमा निकको यो पहिलो अर्धशतक हो । यस्तै ओपनर स्टोइनिसले ५१ बलमा २ छक्का र ४ चौका प्रहार गर्दै ५८ रनको योगदान दिए ।
आज कप्तान ग्लेन म्याक्सवेल १, नाथन कुल्टर–नाइल ५, निक म्याड्सन, क्लिन्ट हिन्चलिफ र बेन डंक खाता नखोल्दै आउट भए । यस्तै पीटर ह्यान्सकम्ब ४ र एडम जम्पा १ रनमा अविजित रहे ।बलिङमा सिड्नीका डानियल साम्सले ३, नेथन म्याकएन्ड्र्यू र क्रिस मोरिसले २–२ विकेट लिए ।
यसअघि टस जितेर पहिला ब्याटिङ गरेको सिड्नीले निर्धारित २० ओभरमा ७ विकेट गुमाएर १ सय ४३ रन बनायो । उसका लागि एलेक्स रसले ४०, म्याथ्यू गिलक्सले २८, कप्तान कलुम फर्ग्युसनले १९, डानियल साम्सले १३ र अर्जुन नायरले अविजित १७ रन बनाए । अन्य खेलाडीले भने दोहोरो अंकमासमेत रन जोड्न सकेनन् ।
बलिङमा मेलबर्नका हरिश रौफ र कप्तान ग्लेन म्याक्सवेलले घातक बलिङ गरे । सन्दीपको स्थानमा प्लइङ ११ मा समावेश गरिएका फास्ट बलर हरिश रौफले ४ ओभरमा २४ रन दिएर ३ विकेट लिए । यस्तै कप्तान म्याक्सवेलले ३ ओभरमा १७ रन दिएर महत्वपूर्ण २ विकेट लिए । यस्तै क्लिन्ट हिन्चलिफ र एडम जम्पाको नाममा एक–एक विकेट रह्यो ।
सुरुवातका ४ खेलमा मौका पाएका सन्दीपले पाँचौ म्याच भने गुमाए । चोटका कारण सन्दीपले सिड्नी विरुद्धको म्याच गुमाएका हुन् । आजको जितसँगै मेलबर्न स्टार्स ८ अंक जोड्दै तालिकाको शीर्ष स्थानमा उक्लिएको छ । उसले ५ म्याचमा ४ मा जित र एक खेलमा मात्र हारको सामना गरेको छ ।मेलबर्नले आफ्नो छैठौं म्याच शनिबार गत सिजन विजेता आरोन फिन्च नेतृवको मेलबर्न रेनिगेड्सविरुद्ध खेल्ने छ ।
