काठमाडौं – बलिउड अभिनेत्री सन्नी लियोन अब निर्माता पनि बन्ने भएकी छन् । उनको निर्माणमा बन्ने पहिलो सिनेमाको सुटिङ सुरु भइसकेको छ । तर, उनले सिनेमाको नाम खुलाएकी छैनन् । यसै वर्ष सिनेमा रिलिज गर्ने भएकाले सन्नी उत्साहित छन् । सिनेमाको काममा उनका श्रीमान् ड्यानिअल वेबरले पनि सघाइरहेको जनाउँदै उनले भनेकी छन्, ‘मेरो सिनेमामा सामाजिक सन्देश छैन । साइकोलोजीकल थ्रिलर सिनेमा हो ।’

सन्नीलाई बलिउडमा स्थान बनाउन निकै संघर्ष गर्नु परेको थियो । अब निर्माताका रूपमा पनि निकै संघर्ष गर्नुपर्ने उनको बुझाइ छ । सन्नीले वस्तविकता दर्शाउँदै भनेकी छन्, ‘बलिउडमा सलमान, आमिर र शाहरुख वा उनीहरूकै स्तरका ठूला सिनेमावालाहरूलाई बाहेक अरूलाई निश्चित बजेटमै खुम्चिनुपर्ने बाध्यता हुन्छ ।’

सन्नीले आफूसँग कुनै इगो नरहेको जनाउँदै सुटिङ स्पटमा जरुरी परे अरूलाई चिया बाँड्न पनि तयार रहेको अभिव्यक्ति दिएकी छिन् । उनले भनेकी छन्, ‘मेरा लागि सबै बराबर हुन् । त्यसैले हाम्रो फिल्म निर्माण र सुटिङ निकै रोचक भइरहेको छ ।’