काठमाडौंः अष्ट्रेलियामा जारी बिग बास लिग (बीबीएल) अन्तर्गत आफ्नो आठौँ म्याचका लागि मेलबर्न स्टार्सले टोली घोषणा गरेको छ । स्टार्सले मेलबर्न रेनेगेड्स विरुद्धको खेलका लागि आज १३ सदस्यीय टोली घोषणा गरेको हो ।

आठौं म्याचमा पनि नेपाली लेग स्पिनर सन्दीप लामिछाने टिममा अटाएका छन् । शुक्रबार हुने म्याचमा विकेटकीपर–ब्याट्सम्यान पीटर ह्यान्सकम्ब, स्पिनर एडम जम्पा र ब्याट्सम्यान निक म्याड्सनलाई विश्राम दिइएको छ ।

ह्यान्सकम्ब र जम्पाले अष्ट्रेलियाले खेल्ने वानडे सिरिजका लागि विश्राम लिएका हुन् । म्याड्सनले भने चोटका कारण शुक्रबारको खेल गुमाएका मेलबर्नले जनाएको छ । उनीहरुको स्थानमा सेब गोच, लान्स मोरिस र साम इलियटले टोलीमा मौका पाएका छन् ।

जारी प्रतियोगितामा सन्दीप आवद्ध मेलबर्नले उत्कृष्ट प्रदर्शन गरिरहेको छ । उसले ७ म्याचमा ६ मा जित हासिल गर्दै १२ अंक जोडेको छ । र, मेलबर्न शीर्ष स्थानमा कायमै छ ।

यता आरोन फिन्च नेतृत्वको रेनेगेड्सले भने ७ म्याच खेल्दा सबै खेलमा हारको सामना गरेको छ । गत सिजन विजेता रेनेगेड्स अंक विहिन हुँदै पुछारमा छ ।

रेनेगेड्सविरुद्ध मेलबर्न स्टार्सको टिमः ग्लेन म्याक्सवेल (कप्तान), हिल्टन कार्टराइट, नाथन कटर–नाइल, बेन डन्क, साम इलियट सेव गोच, क्लिन्ट हिन्चलिफ, सन्दीप लामिछाने, निक लार्किन, लान्स मोरिस, हरिस रौफ, मार्कस स्टोइनिस र डानियल वर्रल । 

बीबीएल बिग बास लिग मेलबर्न रेनेगेड्सविरुद्ध मेलबर्न स्टार्स सन्दीप लामिछाने