काठमाडौंः टी–२० क्रिकेट सिरिजको चौथो खेलमा घरेलु टोली मलेसियाले हङकङकलाई १ सय ६८ रनको लक्ष्य दिएको छ । उसका लागि वीरन्दीप सिंहले ५०, कप्तान अहमद फैजले ४३, खिजार हयातले २८, शार्विन मुनिआन्डीले १३ रन बनाए । अन्य खेलाडीले भने दोहोरो अंकमा समेत रन बनाउन सकेनन् । बलिङमा हङकङ टोलीका मोहसिन खानले ३, ऐजाज खानले २ र अफ्ताब हुसैनले एक विकेट लिए । पाँच खेलको सिरिज मलेसियाले २ म्याच अगावै जितिसकेको छ ।

इस्टर्न रिजन कप खेल्नुअघि हङकङ र मलेसिया टी–२० सिरिज खेलिरहेका हुन् । यो प्रतियोगिता फेब्रुअरी २९ देखि मार्च ७ सम्म थाईल्याण्डमा सुरु हुँदैछ । यो प्रतियोगितामा इस्टर्नबाट मलेसिया, हङकङसहित नेपाल सिंगापुर, थाइल्याण्डले पनि सहभागिता जनाउने भएका छन् । चीन, म्यानमार र भुटानले भने कोरोना भाइरसका कारण यो प्रतियोगिता नखेल्ने भएका छन् ।

नयाँ खेल तालिका अनुसार नेपालले आफ्नो पहिलो खेलमा २९ फेब्रुअरीमा मलेसियासँग खेल्ने छ । त्यस्तै नेपालले आफ्नो दोस्रो खेलमा १ मार्चमा हङकङसँग, तेस्रो खेलमा ४ मार्चमा थाईल्याण्ड र अन्तिम खेलमा ६ मार्चमा सिंगापुरसँग खेल्ने छ । प्रतियोगिताको शिर्ष २ टीम एसिया कप छनोटमा प्रवेश गर्ने छन् । तीन टीमले सहभागिता नजाउने भए पनि खेल राउन्ड रोबिनमा हुने भएको छ ।

टी–२० क्रिकेट सिरिज हङकङकविरुद्ध मलेसिया