काठमाडौंः शनिबारबाट थाइल्याण्डमा सुरु हुने एसीसी टी–२० इस्टर्न रिजन कप अन्तर्गत आफ्नो पहिलो खेलमा नेपालले मलेसियाको सामना गर्दैछ । नेपाल र मलेसियाबीचको खेल शनिबार दिउँसो १२ः१५ बजेदेखि सुरु हुनेछ । पछिल्लो समय मलेसिया राम्रो लयमा देखिएकाले नेपाललाई उसले बलियो चुनौती दिनसक्ने सम्भावना छ ।

केही दिनअघि घरेलु मैदानमा हङकङविरुद्ध भएको पाँच खेलको टी–२० श्रृखंलामा मलेसियाले ५–० ले ‘क्लिन स्विप’ गरेको थियो । हालसम्म नेपाललाई हराउन नसके पनि पछिल्लो समय मलेसियाले चुनौती दिँदै आएको छ । पछिल्ला तीन टी–२० म्याचमा नेपालसँग मलेसिया पराजित भएको थियो । यी तीन खेलमा नेपालसँग मलेसिया एक खेलमा ६ रनको झिनो अन्तरले पराजित भएको थियो ।

नेपालले मलेसियालाई हराउँदै जारी प्रतियोगितामो सुरुवात गर्न चाहन्छ । त्यही अनुसार पनि नेपालले तयारी गरेको छ । थाइल्याण्ड जानुअघि नेपाली क्रिकेट टीमका कप्तान ज्ञानेन्द्र मल्लले पनि उद्देश्य ‘च्याम्पियन’ बन्ने रहेको बताएका थिए ।

प्रतियोगिताको शीर्ष स्थानमा पुग्ने २ टीम इस्टर्न रिजन एसिया कप छनोटमा पुग्ने छन् । वेस्टर्न रिजनबाट कुवेत र यूएई एसिया कप छनोटमा प्रवेश गरिसकेका छन् । एसिया कप छनोटमा विजेता टीमले एसिया कप खेल्ने मौका पाउने छ ।

मलेसियाविरुद्ध नेपालको सम्भावित प्लेइङः ज्ञानेन्द्र मल्ल (कप्तान), पारस खड्का, दीपेन्द्रसिंह ऐरी (उपकप्तान),   आरिफ शेख, कुसल मल्ल, विनोद भण्डारी (विकेटकीपर), सन्दीप जोरा, सन्दीप लामिछाने, करण केसी, अविनाश बोहरा र सुशन भारी । 

सम्भावित बेन्चः पवन सरार्फ, भुवन कार्की र किशोर महतो । 
      
 

मलेसियाविरुद्ध नेपाल टी–२० इस्टर्न रिजन कप सम्भावित प्लेइङ ११