काठमाडौंः थाइल्याण्डमा जारी एसीसी इस्टर्न रिजन पुरुष टी–२० कप अन्तर्गत नेपालले आफ्नो दोस्रो खेलमा हङकङविरुद्ध नेपालले टस जितेर बलिङ रोजेको छ । नेपाल र हङकङबीचको खेल नेपाली समयअनुसार बिहान ८ः१५ बजेदेखि सुरु हुनेछ । पहिलो खेलमा मलेसियासँग २२ रनले पराजित भएको नेपालले आज हङकङलाई हाराउँदै लय समात्न चाहेको छ ।

जारी प्रतियोगितामा हङकङको भने यो पहिलो म्याच हो । पछिल्लो समय तुलानात्मक रुपमा नेपालभन्दा हङकङ कमजोर भएको देखिन्छ । उसका महत्वपूर्ण खेलाडी अंशुमन रथ र बाबर हयात टोलीमा छैनन् । तथापि नेपाललाई चुनौती दिनसक्ने खेलाडी हङकङसँग अझै छन् ।

किन्चित शाह, अजिज खान, निजाकत खान र हारुन अरशद हङकङ टीमका बलिया हतियार हुन् । हङकङविरुद्ध पनि नेपाली टीमले मलेसियासँग खेलेकै प्लेइङ ११ मा उतारेको छ । आज पनि भुवन कार्की, सन्दीप जोरा र किशोर महतोले प्लेइङ ११ मा मौका पाउन असफल भएका छन् । प्रतियोगितामा नेपाल र मलेसियासहित थाइल्यान्ड, सिंगापुर र हङकङले प्रतिस्पर्धा गर्ने छन् । राउण्ड रोबिन आधारमा चल्ने प्रतियोगिताको शीर्ष दुई टोलीले एसिया कप छनोटमा स्थान बनाउने छन् ।

हङकङविरुद्ध नेपालको प्लेइङ ११ः ज्ञानेन्द्र मल्ल (कप्तान), पारस खड्का, दीपेन्द्रसिंह ऐरी (उपकप्तान), आरिफ शेख, कुसल मल्ल, विनोद भण्डारी (विकेटकीपर) पवन सरार्फ, सन्दीप लामिछाने, करण केसी, अविनाश बोहरा र सुशन भारी ।

बेन्चः सन्दीप जोरा, भुवन कार्की र किशोर महतो ।

 

हङकङविरुद्ध नेपाल इस्टर्न रिजन पुरुष कप