काठमाडौंः नेपालकै पहिलो स्ट्यान्ड–अप कमेडी रियालिटी सो ‘कमेडी च्याम्पियन’ को विजेता हिमेश पन्त भएसँगै अर्का प्रतिस्पर्धी खड्गबहादुर पुन मगरका ‘खबपुका’ समर्थकहरु विरोधमा उत्रिएका छन् ।

विजेता छनोट निस्पक्ष नभए भन्दै उनका समर्थकहरु विरोधमा उत्रिएका हुन् । खबपुका समर्थकहरु शनिबार ‘फिनाले’ भएको स्थल बाहिर नाराबाजी गर्न थालेका थिए ।  

नारीबाजी भएपछि कार्यक्रमका निर्णायकमध्ये सन्तोष पन्तले भने, ‘हिमेश पन्तले खबपु भन्दा १० लाख भोट बढि ल्याएका छन् । कसरी खबपु विजेता हुने? यो पनि कुनै तर्क हुन सक्छ? धाँधली कार्यक्रम आयोजकले गरेको भए हामी जजहरु चुप बस्थ्यौ होला त? यो विरोध वेकार हो । भोटिङ कै आधारमा विजेता भएका हुन् हिमेश पन्त ।’ 
 
यस विषयमा कार्यक्रम निर्माण पक्षले पनि कुनै किसिमको धाँधली नभएको बताएको छ ।  

हिमेश बने पहिलो ‘कमेडी च्याम्पियन’ 

नेपालकै पहिलो रियालिटी सो ‘कमेडी च्याम्पियन’ को उपाधि धादिङका हिमेश पन्तले जितेका छन् ।

उनले शनिबार ‘ग्रान्ड फिनाले’मा खड्गबहादुर पुन मगर (खबपु) र सुमन कोइरालालाई पछि पार्दै पहिलो संस्करणको ‘कमेडी च्याम्पियन’ को उपाधि जितेका हुन् ।

उपाधिसहित हिमेशले २५ लाख नगद र कार जिते । उनलाई मदनकृष्ण श्रेष्ठ र हरिबंश आचार्य मह जोडीले पुरस्कार वितरण गरेका थिए ।

‘कमेडी च्याम्पियन’को पहिलो संस्करणमा सन्तोष पन्त, मनोज गजुरेल, प्रदीप भट्टराई र ऋचा शर्मा निर्णायक रहे । सोको होस्ट रिमा विश्वकर्माले गरिन् । 

कमेडी च्याम्पियन हिमेश पन्त सुमन कोइराला सन्तोष पन्त खड्गबहादुर पुन मगर