केपी ओलीले काँध थापेका कृपासुरको यस्तो कर्तुतः भुँडी बोकाएर भाग्ने देखि बुहारीलाई गोली ठोक्नेसम्म
२०७२ साल जेठ १८ गते तत्कालिन पर्यटन मन्त्री कृपासुर शेर्पाले जिल्ला प्रशासन कार्यालय काठमाडौँबाट डोर मगाए । मन्त्रीले डोर (बोलाएको ठाउँमा पुगेर काम गरिदिने सरकारी टोली) डाकेपछि प्रशासनका कर्मचारी मन्त्रालय पुगे । मन्त्री शेर्पाले आफ्नो च्याम्बरको ढोका लगाए । र, भित्री चुरो खोलेः यो मेरो छोरो हो । यसलाई नागरिकता दिन प¥यो । प्रशासनका कर्मचारी मुखामुख गरे । फिस्स हाँसे र काम थाले । किनकी विषय बाहिरफेर निकै गनाइसकेको थियो । कर्मचारी भएकाले मात्र मन्त्रीका अगाडि उनीहरुले मुख छोड्न सकेनन् ।
अघिल्लो दिन मन्त्री कृपास’र टेलिभिजनको पर्दामा मच्चिदै थिए । उनीसँगको कुराकानी प्रत्यक्ष प्रशारण भइरहेको थियो । सरकार फेरिन लागेकाले १३ दिनमै मन्त्री पद जाने सम्भावनाका बारेमा प्रस्तोताले प्रश्न गरिरहेका थिए । ‘म मजदुर, किसान, गरिव जनता, महिला, उत्पीडित समुदाय र क्षेत्रको पक्षमा संर्घष गर्न राजनीतिमा लागेको हुँ । मन्त्री हुनका लागि होइन । त्यसैले मन्त्रीको चिन्ता छैन ।’ उनी कड्किदै थिए । त्यसै मेसोमा प्रस्तोताले उनलाई तस्बिर देखाएर सोधे, ‘यी महिला र युवक को हुन् ? महिलामाथि व्यविचार गर्ने तपाईले यस्तो भन्न सुहाँउछ ?’ कृपासुर लरबराए । अनि, एकै सासमा भने, ‘मेरी पत्नी र छोरा हो । मेरो परिवारमा तपाई नछिर्नोस् ।’ कृपासुरले धनमाया दर्नाल र गणेशलाई पहिलो पटक श्रीमती र छोरा स्विकार गरेको क्षण थियो । उनले छोरा गणेशलाई उहिल्यै नागरिकता दिएको भने जिद्धि गरिरहे । कृपासुरले दलित युवतीलाई भूँडी बोकाएर फरार भएको र श्रीमती बृद्ध भइसक्दापनि नहेरेको विषयले राजनीति तरंगित भएको थियो । जसलाई उनले असान्र्दभिक बहश भनि बढी नउचाल्न आग्रह गरिरहे । कार्यक्रम सकिएलगत्तै उनी सोझै गणेशको डेरामा गए । बर्षौँ वेवास्ता गरिएकी श्रीमती र कहिल्यै आफ्नो स्विकार नगरिएको छोरालाई साथमा राखेर फोटो खिचाए । अनि फेसबुकमा मेरी श्रीमती र छोरो भनेर पोष्ट गरे । भोलिपल्ट सिंहदरबारमा डोर बोलाएर गणेशलाई नागरिकता दिए । अंश दिने र अमेरिका पठाइदिने आश्वासनपनि दिए । त्यसपछि एउटा कागजमा गणेशलाई हस्ताक्षर गर्न लगाए । जसमा केही संचारमाध्यमले आफ्नो परिवारका बारेमा काल्पनिक हल्ला चलाएको र बुबाको प्रतिष्ठामा आँच पु¥याउन खोजेको भन्दै कपोलकल्पित कुराको पछाडि नलाग्न सबैलाई आग्रह गरिएको थियो । एमालेभित्र कृपासुरको सवाल पूरानो थिएन । राष्ट्रिय राजनीतिमा उतिसारो नदेखिएका कृपासुर मन्त्री बनेपछि उनको विषय बढी चर्चामा आयो । दुनियाँले थाहा पायो । त्यो भन्दा पहिले नै एमालेमा भयंकर बहश भइसकेको थियो ।
भुकम्पले एमालेको बल्खुस्थित कार्यालय जोखिमयुक्त बनाइदियो । एमालेलाई कार्यालय चाहिएको थियो । कृपासुरले अध्यक्ष केपी ओलीलाई आफु हर्ताकर्ता रहेको संस्थाको कार्यालय पार्टीको प्रयोजनका लागि दिने प्रस्ताव गरे । भोजपुरमा आफुलाई टिकट दिलाउन अध्यक्षले खेलेको भुमिकाको गुन तिर्न आएको भन्दै कृपाशुर कृतज्ञ मुडमा प्रस्तुत भए । ओली मुस्कुराउँदै कृपासुरलाई धाप मारे । त्यसपछि ओलीले कृपासुरलाई मन्त्री बक्सिस दिए । त्यतिन्जेल पार्टी कार्यालय स्तानान्तरणको प्रक्रिया शुरु भइसकेको थियो । अखिल नेपाल महिला संघकी अध्यक्ष तथा पार्टी उपाध्यक्षसमेत रहेकी बिद्या भण्डारीमाथि चर्को दबाब प¥यो । ०३६ सालमा कर्मचारी हुँदा युवतीलाई भूँडी बोकाएर भाग्नेदेखि बहुबिबाह गर्नेसम्मको कुकृत्य गर्ने कृपासुर मन्त्री बन्दा भण्डारीको भुमिकामाथि प्रश्न उठ्न थालेको थियो । उनले अध्यक्ष ओलीसँग चर्को असहमति जनाइन् । मदन भण्डारीको सालिक रहेको ठाउँबाट कृपासुरको कृपाले प्राप्त ठाउँमा पार्टी कार्यालय सार्ने कुरा भण्डारीलाई चित्त बुझेको थिएन । त्यसमाथि महिलामाथि शोषण गरेको विषय जबरजस्त उठेपछि उनले कृपासुरलाई मन्त्रीबाट फिर्ता बोलाउनुपर्ने माग गरिन् । भण्डारीको दबाबमा परेका ओलीले कृपासुरलाई बालकोटमा बोलाए । बिबाद साम्य नभए मन्त्री पद जाने चेतावनी दिए । मन्त्री रहिन्जेल कृपासुरले गणेशलाई थामथुम पारिरहे । अंश आजै दिनेजस्तो गरी प्रस्तुत भए । तर, सधैँ व्यस्तता देखाए । मन्त्रीको छोरो हुन पाउँदा गणेशपनि मख्खै भए । मौन रहे । सरकार फेरिएसँगै कृपासुरको व्यवहारपनि फेरियो । उनले गणेशलाई सकेको गर्न चुनौति दिए । त्यतिन्जेल मन्त्रीका रुपमा कृपासुरले सकेको शक्ति लगाएर गणेशलाई सम्पत्तिबाट बञ्चित गर्ने रणनीति बनाइसकेका थिए । सम्पत्ति कान्छी श्रीमतीको नाममा सारिसकेका थिए । वा, केही सम्पत्ति बेचेर नयाँ किनेको सम्पत्ति शुरुमै कान्छीको नाममा पास गरेका थिए ।
बाबु खोज्न र छोरो प्रमाणित हुन गणेशलाई ३६ बर्ष लाग्यो । सम्पत्ति खोज्न कति बर्ष लाग्ने हो पत्तो छैन । यसै बीच गणेशले आमालाई गुमाए । धनमाया मरेको दिन कृपासुर काठमाडौँमै थिए । गणेशले आमाको मृत्यु भएको खबर कृपासुरलाई सुनाए । कृपासुर आर्यघाटसम्म पनि पुगेनन् । धनमाया (नागरिकताअनुसार बिष्णुमाया) ३० को दशकमा ताप्लेजुङमा चर्चित थिइन् । महिला संघको अध्यक्ष भइसकेकी उनलाई धेरैले भविश्य बोकेकी नेतृका रुपमा हेर्थे । दलितकी छोरीलाई राजाले ठाउँ दिने भन्दै धनमायाको तारिफ गर्थे । त्यही बेला कृपासुर कर्मचारीको रुपमा ताप्लेजुङ पुगे । धनमायासँग मायाको बहानामा शारीरिक सम्बन्ध राखे । जब धनमाया दुई जिऊकी भइन्, कृपासुर कुलेलाम ठोके । संचारको सुविधा नभएको त्यो जमानामा दुई जिऊकी धनमायाले कृपाशुरलाई खोज्न सम्भव भएन । समाजले उनलाई खोज्ने मौका पनि दिएन । कुमारी केटी गर्भवती भएपछि उनको कुनै इज्जत रहेन । उनलाई गर्भवती बनाउने पुरुष को हो भन्ने खोजी गर्न कोही लागेन । राजनीतिक भविश्य र सामाजिक प्रतिष्ठा पूरै गुमाएकी धनमाया डिप्रेशनको शिकार भइन् । औषधी खाइ नखाइ उनी मरेतुल्य जीबन जिउँन विवश थिइन् । मर्नपनि सक्दिनथिन्, समाजलाई चुनौति दिँदै जन्माएको गणेश आँखामा आइहाल्थो ।
यता कृपाशुर एमालेको राजनीतिमा सक्रिय भए । जे गर्नपनि पछि नपर्ने कृपासुरले मज्जैले धन जोडिसकेका थिए । छोटो अवधिमै उनी जिल्ला पार्टीमा स्थापित भए । ओलीको पक्षमा लागेकै कारण उनले कैयौँ विवादस्पद घटनामा चोखिने मौका पाए । आफ्नो पक्षका कार्यकर्तालाई सित्तिमित्ति कारबाहीमा पर्न नदिने ओली प्रवृत्तिले कृपासुरलाई जोगाइरह्यो । जननिर्वाचित सांसदका रुपमा कृपासुर झन बलियो भए ।
कृपाशुरका जेठो छोरा गणेशले स्कुल देख्न पाएनन् । उनको उमेर बुबा पत्ता लगाउँदैमा बित्यो । अवैध सन्तान हुनुको पीडा व्यक्त गर्दा गणेश अहिले पनि भक्कानिने गर्दछन् । चौतर्फी अपमान खेपेका उनी माओवादी भए । पछि उनी एमाले बने । कपी ओलीलाई उनी बुबा बनेर सम्बोधन गर्छन् । शुक्रबार एकाबिहानै गणेश हस्याङ फस्याङ गर्दै ओली निवास बालकोट पुगे । कृपासुरलाई भेट्न गएकी श्रीमती र छोराछोरीलाई गोली हानेर उडाइदिने धम्की सुनेपछि उनी आत्तिएका थिए । उनले ज्यान जोगाइदिन र अंश दिलाइदिन केपी बुबासँग आग्रह गरे । ओलीले कृपासुरसँग कुरा गर्ने जनाए । बालकोटबाट फर्कदै गर्दा कृपासुरको फोन आयो । फोनमा कृपासुरले गणेशलाई भने, ‘ओलीलाई बा भन्दै गएपछि उसैले देला सम्पत्ति । मेरोमा किन आउनु ?’ कृपासुर ओलीलाई समेत चुनौति दिने गरी आक्रामक देखिन थालेका छन् । ओली कतिन्जेल कृपासुरलाई काँध थापिरहन्छन् ? प्रश्न पेचिलो छ ।
https://youtu.be/mo_CXaRwr50 दलित पत्नीपट्टिका बुहारी र नातिनातिना घर पस्न खोज्दा कृपासुरले गोली ठोकेर मार्ने धम्की दिए (भिडियोसहित) ganesh sherpa KP Sharma Oli kripasur sherpa
