ब्रोइलर कुखुराको मासु र अन्डाबाट करोडौँ आम्दानी
भदौ ४ । झापामा ब्रोइलर कुखुराको मासु बिक्रीबाट वार्षिक करिब ३३ करोड ९६ लाख आम्दानी भइरहेको छ ।
राष्ट्रिय योजना आयोगको सचिवालय, केन्द्रीय तथ्यांक विभागद्वारा आव २०७१/७२ मा गरिएको व्यावसायिक कुखुरापालन सर्वेक्षणको नतिजामा सो कुरा उल्लेख छ । हालै सार्वजनिक गरिएको सर्वेक्षणबाट अन्डा बिक्रीबाट करिब पाँच करोड ८६ लाख र कुखुराबाट उत्पन्न हुने मल बिक्रीबाट ६२ लाख ३४ हजार आम्दानी हुने गरेको तथ्यांक विभागका निर्देशक बद्री कार्कीले जानकारी दिए ।
पहिलो पटक नेपालमा गरिएको सो सर्वेक्षणमा झापामा कुखुरापालन व्यवसाय संख्या ५६२ रहेको जनाइएको छ, जसमा ब्रोइलर व्यवसायको संख्या ५४० मा नौ लाख ३३ हजार ब्रोइलरको संख्या रहेको र लेयर्स व्यवसायको संख्या २२ मा लेयर्स कुखुरा ३० हजार संख्यामा छन् । सर्वेक्षणले झापामा कुखुराको मासु दुई हजार ७३ मेट्रिक टन र अन्डा ६९ लाख ६९ हजार उत्पादन भइरहेको देखाएको छ ।
पाँच सय कुखुराभन्दा बढीका व्यवसाय मात्र सर्वेक्षणमा राखिएको जनाइएको छ । सञ्चालकसहित कामदार सङ्ख्या एक हजार १४ र अस्थायी कामदार व्यक्ति दिन संख्या नौ हजार १०० रहेको सर्वेक्षण नतिजामा उल्लेख छ ।
ऋण लिएर व्यवसाय सञ्चालन गर्नेको सङ्ख्या ४८ र ऋणको आवश्यकता महसुस गर्ने व्यवसायको सङ्ख्या ७६ छ । नाफामा सञ्चालित व्यवसायको सङ्ख्या ९३ देखिएको बताइएको छ ।
सर्वेक्षणमा व्यवसायीले सहुलियतपूर्ण ऋणको व्यवस्था, कुखुरा र अन्डा बिक्रीका लागि उचित बजारको व्यवस्था, स्थानीयस्तरमा प्राविधिक सेवाको सहज पहुँच तथा निःशुल्क सेवा, चल्ला एवम् दानाको गुणस्तरको सरकारद्वारा कडाइका साथ अनुगमन, सरकारले कुखुरा र अण्डाको मूल्य निर्धारण गर्नुपर्ने जस्ता माग सरकारसँग राखिएको सर्वेक्षणमा उल्लेख छ ।
