भदौ - १४ । राजधानीको भृकुटी मन्डपमा नाडा अटो शो मंगलबारबाट सुरु भएको छ । नेपाल अटोमोबाइल डिलर्स एसोसिएसनको आयोजनामा हुने प्रर्दशनीमा गाडी नै गाडीका स्टल छन् । दसैंको मुखमा अटो शो गरेर धेरैभन्दा धेरैलाई सरल र सहज उद्देश्यले गाडी बिक्री गर्नु आयोजकको उद्देश्य हो । ग्राहकलाई फाइनान्सिङ गर्न सजिलो होस् भनेर बैंकहरुले यो बेलामा गाडी कर्जामा स्किम पनि ल्याउँछन् । माछापुच्छ्रे बैंकले ६.७५ प्रतिशत ब्याज दरमा नाडाकै लागि कर्जा स्किम ल्याएको छ । बैंकले गाडीको मूल्यको ८२ प्रतिशतसम्म कर्जा उपलब्ध गराउँछ सात बर्षसम्मका लागि । हिमालयन बैंकले पनि ब्यक्तिगत प्रयोजनका लागि गाडि किन्नेलाई साढे ६ प्रतिशत ब्याजमै कर्जा दिने घोषणा गरेको छ । यो कर्जा सात बर्षे अवधिसम्म पाइन्छ । बैंकहरुले कर्जाको ब्याज दर मात्र झारेका छैनन् सर्भिस चार्ज पनि घटाएका छन् । ०.२५ प्रतिशतदेखि ०.७५ प्रतिशतसम्म यस्तो शुल्क लिन्छन् । यसअघि यस्तो कर्जाको अतिरिक्ता शुल्क एक प्रतिशतभन्दा माथि हुन्थ्यो । अन्य बैंक तथा वित्तीय संस्थाहरुले पनि कर्जा स्किम घोषणा गरिरहेका छन् । कन्जुमर बैंकिङतर्फ सवारी साधनमा बैंकहरु वढी फोकस पनि छन् । उनीहरुले नाडा अटो सोकै लागि भनेर स्किम नल्याए पनि तुलनात्मक रुपमा अरुभन्दा गाडी कर्जाको ब्याज दर सस्तो राखेका छन् । नेपालमा बार्षिक रुपमा गाडीको ब्यापार बढ्न थालेका कारण पनि बैंकहरु यो कर्जा्तिर आकर्षित भएका छन् । पाँच बर्षअघि नेपालका बैंक तथा वित्तीय संस्थाहरुले हायर पर्चेजअन्तर्गत गाडिमा ५३ अर्ब ९३ करोड रुपैयाँ कर्जा लगानी गरेका थिए । अहिले यो कर्जा एक खर्ब १० अर्ब रुपैयाँ प्रवाह गरिसकेका छन् । अहिले इन्ट्री लेभलको गाडीहरु १३ लाख ९९ हजार रुपैयाँदेखि सुरु हुन्छ । मध्यमवर्गीय उपभोक्तालाई लक्षित गर्दै कम्पनीहरुले २५र३० लाख रुपैयाँसम्मका गाडीहरु भित्राइरहेका छन् । तपाईले बार्षिक औषत साढे सात प्रतिशत ब्याजमा १४ लाख रुपैयाँको गाडी सात बर्षे फाइनान्समा लिनु भयो भने बैंकले ८० प्रतिशतसम्म कर्जा दिन्छन् । यसो हुँदा तपाईले ११ लाख २० हजार रुपैयाँ बैंकबाट फाइनान्सिङ सुविधा पाउनु हुन्छ । यो आधारमा तपाईले मासिक बैंकलाई १७ हजार १७९ रुपैयाँ तिर्नु पर्ने हुन्छ । बैंकहरुले योभन्दा केही सस्तो ब्याजमा र १० बर्ष अवधिसम्मको यस्तो कर्जा उपलब्ध गराइरहेका छन् । यसो हुँदा तपाईले मासिक तिर्नु पर्ने इएमआइ अझ सस्तो पर्न जान्छ । गाडी किन्नका लागि तपाईले आफ्नो आम्दानीको विवरण, नागरिकताको प्रतिलिपी र एउटा पासपोर्ट साइजको फोटो बैंकलाई वुझाउनुपर्छ । तपाईको कार्यालयले तपाईले कति तलवको विवरण दिएपछि कुनैकुनै बैंकले ६ महिनासम्मको बैंक स्टेटमेन्ट पनि माग्न सक्छन् । तपाईले गाडी किन्दा कोही आफन्त ग्यारेन्टर वसेमा उसको पनि आम्दानी र व्यक्तिगत विवरण आवश्यक पर्छ । यति भएपछि बैंकले तपाईले वुझाएको विवरणमा चित्त बुझाएमा ऋण दिन्छ । गाडी कर्जा खासै जोखिमपूर्ण नभएकाले बैंकहरुले आम्दानी स्रोतका आधारमा तपाईलाई सजिलै कर्जा दिन्छन् ।

bank karja nada auto show