असोज ११ । पूर्व गृहमन्त्री तथा मुख्य सचिव माधव घिमिरेको त्रिशुलीमा भएको दुर्घटना शंकास्पद बन्दै गएको छ । मुक्तिनाथ दर्शन गरेर काठमाडौं फर्कने क्रममा बा ९ च १५३१ नम्बरको जीप चितवनको मुग्लिन र कुरिनटारबीचमा आइतबार साँझ सडकबाट त्रिशुली नदीमा खसेको थियो ।

दुर्घटनामा परी मृत्यु भएका तीन जनाको शव भेटिए पनि पूर्वमन्त्री घिमिरेसहित उनका दुई भाइ बेपत्ता छन् । दुर्घटनापछि खोजी कार्य जारी राखिए पनि तीन जनालाई अझै भेटिएको छैन ।

तर त्रिशुलीमा बेपत्ता भएका घिमिरेको मोबाइलबाट चितवनका एसपी बसन्त कुवँरको मोबाइलमा सोमवार विहान ९ बजेर २२ मिनेट जाँदा फोन आएको कुँवर बताएका छन् । झण्डै दश सेकेण्डमात्रै घण्टी बजेर काटिएकाले फोन उठाउन नपाएको कुवँरले बताएका छन् ।

एसपीकै मोबाइलमा फोन आएपछि खोजी गर्दा घिमिरेको मोबाइल र झोलासमेत भेटिएको चितवन प्रहरीले जनाएको छ । भुँइमा च्यापिएको अवस्थामा भेटिएको मोबाइलबाट फोन आउने र फोन गर्दा घरी लाग्ने घरी नलाग्ने हुँदा घटना शंकास्पद देखिएको छ । कुवँरले आफ्नो मोबाइलमा घिमिरेको मोबाइलबाट फोन आएको चितवनका प्रमुख जिल्ला अधिकारी विनोदविक्रम सिंहलाईसमेत सुनाएका थिए ।

एसपी कुँवरको नेतृत्वमा खोजीमा गएको टोलीले नै त्रिशुली नदी किनारमा घिमिरेको मोबाइल फेला पारेको छ । घिमिरेकी आमा चैतन्य कुमारी घिमिरे, भाञ्जा नारायणप्रसाद काफ्ले र अंगरक्षक सशस्त्र प्रहरीका सई रामचन्द्र कार्कीको शव आइतबार साँझ नै फेला परेको थियो । अंगरक्षक कार्कीको शब सोमबार सांझ पशुपति आर्यघाटमा अन्तेष्टि गरिएको छ ।

Madav Ghimire