अपीकाे एक बराबर दुई कित्ता हकप्रद सेयर
चैत - २८ । अपी पावर कम्पनीले सेयरधनीलाई एक बराबर दुई कित्ता हकप्रद सेयर दिने भएको छ । कम्पनीको सोमबार राजधानीमा सम्पन्न विशेष साधारणसभाबाट सो प्रस्ताव पारित गरिएको हो ।
साधारणसभाबाट पारित प्रस्ताव नेपाल धितोपत्र बोर्डमा स्वीकृतिका लागि पठाइनेछ । कम्पनीको हालको सेयर संख्या एक करोड पाँच लाख कित्ता छ । यसबाट विद्यमान एक सेयर बराबर दुई सेयरकादरले हकप्रद सेयर निष्कासन गर्ने प्रस्ताव पारित भएको कम्पनीका अध्यक्ष गुरुप्रसाद न्यौपानेले जानकारी दिए ।
प्रस्तावित सेयर निस्कासनबाट प्राप्त रु दुई अर्ब १० करोडमध्ये रु एक अर्ब सिद्धकाली पावर लिमिटेड कम्पनीले प्रवद्र्धन गर्न लागेको त्रिशूली–गल्छी जलविद्युत् आयोजनामा लगानी गरिनेछ । यस्तै, रु एक अर्ब १० करोड भने विभिन्न सौर्य परियोजनामा लगानी गर्ने तयारी गरिएको छ ।
यस्तै, अपी पावर कम्पनीको हालको चुक्तापुँजी रु एक अर्ब पाँच करोड र जारीपुँजी रु तीन अर्ब रहेकामा पुँजी वृद्धि गरी जारीपुँजी रु चार अर्ब पुर्याउने प्रस्ताव पनि विशेष साधारणसभाले पारित गरेको छ । कम्पनीका अध्यक्ष न्यौपानेले कम्पनीप्रति सेयरधनी र शुभेच्छुकले देखाएको विश्वासलाई सम्मान गर्दै थप नयाँ लगानीका अवसर खोजिएको बताए ।
कम्पनीले निकट भविष्यमा नै अपर चमेलियालगायत आयोजनामा लगानी गर्न लागेको र त्यसले सेयरधनीलाई थप लगानीका अवसर प्रदान गर्ने उनको भनाइ थियो ।
अपी पावर कम्पनी
