असार–१४ । कञ्चनपुर सदरमुकाम महेन्द्रनगरको बजार क्षेत्रमै रहेको भृकुटी उमाविको नजिकै बम विष्फोट भएको छ । भृकुटी उमावि मतदान स्थल नजिकै बम विष्फोट भए पछि मतदाताहरु आतंकित भएका छन् ।

मतदाताहरु मतदान केन्द्रमा लाईनमा रहेर मतदान गरिरहेकै वेला ५० मिटरको फरकमा राखिएको बम विष्फोट भएको हो । महेन्द्रनगरको खुल्लामञ्चको शौचालयको भित्र राखिएको बम विष्फोट भएको प्रहरीले जनाएको छ । विष्फोटबाट कुनै क्षति नभए पनि मतदाताहरु त्रसित भएका छन् ।

बम विष्फोट भएको केहिबेर अघि एकजना युवक उक्त शौचालयबाट बाहिरिए लगत्तै विष्फोट भएको प्रत्यक्षदर्शीहरुले बताएका छन् । उनी त्यही नजिकबाट मोटरसाईकल चढेर गएको बताईएको छ । मतदातालाई आतंकित पार्नका लागि उक्त बम विष्फोट गराएको हुन सक्ने बुझिएको छ ।