काठमाडौँ । गृहमन्त्री रामबहादुर थापा ‘बादल’ ले कारागारभित्रका विकृति र विसङ्गतिलाई हटाउन निर्देशन दिएका छन्  । 

 

आइतबार कारागार व्यवस्थापन विभागको निरीक्षणपछि विभागका कर्मचारीलाई निर्देशन दिँदै गृहमन्त्री बादलले कारागार सुधारमा उपलब्धि र परिणाम निस्कने गरी काम गर्न निर्देशन दिए  । 

उनले कारागारभित्र विभिन्न किसिमका विकृति र विसङ्गति रहेकोबारे आफू जानकार रहेको भन्दै त्यो सच्याउन निर्देशन दिए । 

उनले भने, ‘‘केही कैदीलाई कारागारबाट राति ठमेलको दोहोरी साँझमा लैजानेदेखि घुमाउन विभिन्न ठाउँसम्म लैजाने गरेकोसम्म रिपोर्ट आएको छ, त्यस्तो कार्यमा संलग्नलाई छानबिन गरी कारबाहीको दायरामा ल्याउनुहोस् । ’’

 

जेलरसँगको मिलेमतोमा जेलभित्रका केही चौकिदार, नाइके, भाइनाइकेहरूले अन्य बन्दीलाई दुःख दिने गरेको गुनासो सुनिएको भन्दै त्यस्ता कार्यमा संलग्न व्यक्तिहरूलाई तत्काल जेल सरुवा गरी त्यसको जानकारी मन्त्रालयलाई दिन निर्देशन दिएको छ  । याे खबर अाजकाे गोरखापत्रमा छ ।